Wasiirka Arrimaha Dibadda Mareykanka, Antony Blinken oo lugtii ugu dambeysay ee booqashada uu ku marayo Bariga Dhexe ku tegay Israel ayaa maanta siyaabooyin kala duwan ula kulmay Madaxweynaha iyo Raysal Wasaaraha Israel.
Wasiirka ayaa Madaxweynaha Israel, Isaac Herzog kula kulmay Magaalada Tel Aviv, halka uu Raysal Wasaare Benjamin Netanyahu kula kulmay Magaalada Jerusalem, isagoona gadaal ka riixaya qorshaha uu Mareykanku ku doonayo in xalka loogu helo colaadda Gaza.
Wasiirka ayaa Madaxda Israel kala hadlay heshiiska xabad joojinta Gaza, sii deynta la haysteyaasha Israeliyiinta iyo in la ballaariyo gargaarka bani’aadantinimo ee Marinka Gaza.
Antony Blinken, Wasiirka Arrimaha Dibadda Mareykanka ayaa Raysal Wasaaraha Israel ku booriyay in ay aqbalaan hindisihii ugu dambeeyay soo jeedinta heshiiska ee lixda toddobaad lagu hakinayo dagaalka ay kula jirto Xamaas iyo sii deynta qaar ka mid ah la haysteyaasha Israeliyiinta, inkastoo Israel aysan markii horeba wax dood ah ka qabin in si ku-meel-gaar ahi loo hakiyo dagaalka, balse cidda diidan ay tahay Xamaas. Xamaas ayaa iyadu dooneysa in xabad joojintu ay noqoto mid waarta, si ay u sii deyso la haysteyaasha.
Intii uu Blinken kulanka la lahaa Raysal Wasaare Netanyahu ayuu ku celiyay mowqifka Mareykanka, ee ah inaysan Israel qorshe la’aan weerarin deegaanka Rafah, oo ay hadda gabaadsanayaan dad tiradooda lagu sheegay 1.5 milyan oo qof oo barakacayaal ah, iyadoo markaasi laga fogeynayo waxyeeleynta rayidka, sida uu sheegay Matthew Miller, Afhayeenka Wasaaradda Arrimaha Dibadda Mareykanka.
Ka hor inta uusan Blinken la kulmin Netanyahu, kulan uu la yeeshay Madaxweyne Herzog ayuu ka sheegay in hadda la joogo, waqtigii heshiiska xabad joojinta ah la gaari lahaa.
“Waxaan go’aansanay in la gaaro xabad joojin horseedi karta dib u soo celinta la haysteyaasha, waana hadda waqtigii heshiiskaasi la gaari lahaa, sababta keliya ee taas loo gaari waayayna waa Xamaas.” Ayuu yiri Blinken.
Warbaahinta reer galbeedka ayaa ku warameysa in Blinken uu dadaal ugu jiro in la baajiyo duulaanka uu Netanyahu iclaamiyay ee ay ciidamadiisu ku qaadayaan deegaanka ku yaala koonfurta Marinka Gaza ee Rafah.
Warbaahinta ayaa sheegeysa in Maamulka Madaxweyne Joe Biden uu adkeynayo in xal loo helo dagaalka daba dheeraaday ee Gaza, oo madax xanuun ku riday Madaxweynaha Mareykanka.
Saraakiisha Mareykanka ayaa laga soo xigtay in xabad joojinta ku-meel-gaar ah ay horseedi doonto mid joogto ah, si Xamaasna ay u sii deyso la haysteyaasha Israeliyiinta ee ay ku soo qafaalatay weerarkii October 7-deedii.
Wasiir Blinken ayaa Warbaahinta u sheegay in heshiiska uu sidoo kale horseedi doono in gargaarka cuntada, biyaha iyo dawada ay si mug leh u gaaraan dadka u baahan, halkaas oo dagaalku uu ka dhaliyay masiibo bani’aadantinimo.
Biden oo lagu wado in bisha November uu dib ugu tartamo xafiiska ayaa cadaadis xoog leh kala kulmaya bulshada Mareykanka, kuwaa oo culeys ku saaraya in la joojiyo dhiigga ku daadanaya Marinka Gaza.
Kororka dhimashada iyo dhaawaca faraha badan ee shacabka Falastiiniyiinta ee degan Gaza ayaa la sheegaya inay saameysay shacabka Mareykanka, waana sababta ugu weyn ay Biden uga dalbanayaan inuu Netanyahu ku khasbo in la soo afjaro dagaalka, la haysteyaashana guryahooda lagu soo celiyo.
Shacbiyadda Biden ee gudaha ayaa la sheegay inay hoos u dhacday, muddada toddoda bilood ku dhow ee ay Israel weerarada ku hayso dadka rayidka ah. Biden ayaa ka cararaya inuu ku hungoobo doorashada soo socota.
Xaaladda daran ee bani’aadantinimo ee Israel ka abuurtay Gaza ayaa dhalisay carro caalami ah, taasoo si adag loogu dhalleeceeyay Xukuumadda Raysal Wasaare Netanyahu.
Xukuumadda Netanyahu ayaa lagu cambaareeyay in Ciidamada Israel ay si aan kala sooc lahayn ay dadka ugu leynayaan Gaza, iyagoo ku andacoonaya inay la dagaalamayaan Xamaas.
