Ugu yaraan toddobo qof ayaa la xaqiijiyay inay ku dhinteen weerar xagga cirka ah, oo Ruushka uu gelinkii dambe ee Jimcihii ka gaystay Magaalada Kharkiv ee waqooyi bari Ukraine.
Saraakiisha Ukraine ayaa xaqiijiyay in 77 kalena ay ku dhaawacmeen weerarkaasi, ka dib markii la bartilmaameedsaday dhisme dheer oo dadka rayidka ah ay deganaayeen.
Muuqaalada goobta laga soo qaaday ayaa muujinaya holac iyo uuro madow oo ka soo baxaya qaybta sare ee dhismaha, iyadoo Shaqaalaha Dab Demiskana ay goobta ka daadgureeyeen shacabka. Muuqaalada ayaa sidoo kale laga arki karay gaadiid dhulka yaala oo gubanaya.
Saraakiisha Ukraine ayaa Ruushka ku eedeeyay in uu weerarka u adeegsaday gantaalaha nooca la hago.
Gudoomiyaha gobolka Oleh Syniehubov ayaa sheegay in gabar 14 jir ah ay ka mid tahay dadka ku dhintay weerarka, isla-markaana ay sagaal carruur ahi ku jiraan kuwa dhaawacmay.
Oleh Sinehubov ayaa xusay in 20 ka mid ah dadka dhaawacmay ay xaaladoodu garaab tahay.
Weerarkan ayaa dhacay saacado ka hor, inta uusan Madaxweynaha Ukraine, Volodymyr Zelensky xilka ka qaadin Taliyihii Ciidanka Cirka, General Mykola Oleshchuk, kaas oo xalay shaqada laga eryay.
Madaxweynaha Ukraine oo cambaareeyay weerarkaasi ayaa dhammaan dalalka reer galbeedka ka dalbaday inay ogolaadaan in hubka ay siiyeen ciidamadiisa si buuxda loogu weeraro bartilmaameedyada gudaha Ruushka.
Madaxweynaha ayaa ku andacoonaya in bartilmaameedyada militari ee Ruushka ay Kyiv ka caawinayaan in laga hortago weerarada baahsan ee Ruushka.
Madaxweyne Zelensky ayaa Ruushka ku eedeeyay in uu beegsaday dad rayid ah, isla-markaana laga hortagi karay weerarkan ka dhacay Kharkiv, haddii Ukraine ay awood u leedahay in diyaaradaha Ruushka lagu burburiyo saldhigyada militari ee ay ka soo kacayaan.
Kharkiv ayaa ku taala waqooyi bari Ukraine, waana magaalada labaad ee dalkaasi ugu weyn.
Kharkiv ayaa sidoo kale ah mid ka mid ah gobolada dalkaasi Ukraine, waana gobolka ay xaruntiisa isku magaca yihiin, waana Magaalada Kharkiv oo qiyaastii 20km jirta xuduudda Ruushka.
