Xoogaga Xuuthiyiinta Yemen ayaa weerar gantaal ku qaaday gudaha Israel, iyadoo seeriga digniinaha laga maqlay magaalooyin ay ku jirto Tel Aviv.
In ka badan laba milyan oo Israeliyiin ah ayaa saaka raadsaday gabaad, ka dib markii dhawaqa digniinaha laga maqlay qaybo badan oo bartamaha Israel ah.
Taliska Militariga Israel ayaa sheegay in hannaanka difaaca hawada uu ka hortagey gantaal laga soo tuuray dalka Yemen, balse firir ka dhashay weerarka ayay sheegeen inay ku soo dhaceen maxadada tareenada ee Modi’in.
Taliska ayaa warsaxaafadeed ku sheegay inaysan jirin cid wax ku noqotay weerarka gantaal ee lagaga soo qaaday dhanka dalka Yemen.
Warbaahinta Israel ayaa sheegtay in firirku uu waxyeeleeyay mid ka mid ah jarjarooyinka wiishka korontada ku shaqeeya ee xarunta tareenada laga raaco iyo weliba goob ganacsi oo ku dhex taala xaruntaasi.
Adeegga Gurmadka Degdegga ee Magen David Adom ayaa sheegay in ay goobta ka qaadeen sagaal qof oo qaba dhaawacyo fudud.
Adeegga MDA ayaa sheegay in dadkan ay ku dhaawacmeen is buurasho ka dhalatay, intii ay u cararayeen goobta gabaadka ee gantaalada laga galo.
Weerarka ayaa sidoo kale sababay dab ka kacay meel bannaan oo ku taala bartamaha Israel. Warbaahinta Israel ayaa soo bandhigtay muuqaal muujinaya Shaqaalaha Dab-Demiska oo ku howlan baqtiinka dabkaasi.
Hizam Al Assad oo ka tirsan Xafiiska Siyaasadda Xuuthiyiinta ayaa sheegay in gantaalka uu ahaa mid xoog badan, oo ka gudbay dhammaan difaacyada Israel, isla-markaana uu ku dhacay aag militari oo ku yaala Lod oo u dhow Garoonka Diyaaradaha Ben Gurion ee duleedka Tel Aviv.
Hizam Al Assad ayaa shacabka Israel ugu baaqay inay si taxadar leh galabta u dhageystaan warka ay ka soo saari doonaan weerarkaasi, isla-markaana ay sugaan gantaalo kaloo hor leh.
Nasruddin Amer oo ka tirsan Xafiiska Warbaahinta Xuuthiyiinta ayaa isna sheegay in gantaalkoodu uu gaaray bartamaha Israel, ka dib markii illaa 20 gantaal ay ku guuldareysteen sida uu yiri inay qabtaan.
Xuuthiyiinta oo qoraal ku baahiyay Telegram-ka ayaa sheegay in Afhayeenka Militariga, General Yahya Saree uu faah faahin ka bixin doono hawlgal si qoto dheer loogu beegsaday bay yiraahdeen Sahyuuniyadda.
Warbaahinta Xuuthiyiinta ayaa sheegtay in weerarka loo adeegsaday gantaal cusub, kaas oo ay u suurtagashay inuu ka baxsado nidaamka difaaca hawada ee Israel.
Tani ayaa xoojisay walaacii ay Israeliyiintu ka muujinayeen xaaladda amni ee Israel ee ka dhalatay duulaanka ay Ciidamada Israel ku qaadeen Marinka Gaza.
Weerarkan ayaa imanaya, iyadoo laga baqdin qabo dagaal buuxa oo haatan ka dhex qarxa Israel iyo Ururka Xisbullah ee dalka Lubnaan.
