Maleeshiyada Al Shabaab ayaa gelinkii dambe ee Axaddii toddobo nin ku toogtay fagaare ku yaala Degmada Jilib ee Gobolka Jubbada Dhexe.
Xubnahan oo lagu toogtay Fagaaraha Macalin Aadan Xaashi Cayrow ee degmadaasi ayaa shan ka mid ah lagu eedeeyay inay u basaasayeen Sirdoonada Mareykanka iyo Kenya, halka labada kalena la sheegay inay ka tirsanaayeen Ciidamada Dowladda Federaalka iyo kuwa Jubbaland.
Qaadiga Maxkamadda Al Shabaab ee Gobolada Jubbooyinka ayaa goobta ka sheegay in raggaasi ay maxkamadda ka hor qirteen eedeymihii loo soo jeediyay.
Xubnaha la toogtay ayaa lagu kala magacaabaa:-
Cali Bakar Yuusuf (Xamza Baajuuni) 32 jir
Juulo Muwan Joule Jaaka (Yaasir) 28 jir
Jamaal Idiris Nayaaga 23 jir
Talar Cabdulle Aadan 55 jir
Deeq Faarax Yuusuf 33 jir
Mursal Xasan Yuusuf 19 jir
Ibraahim Maxamed Ibraahim 27 jir
Waa tiradii ugu badneyd ee ay sanadkan Shabaabku ku toogtaan fagaare ku yaala dhulka ay maamulaan.
Shabaabka loogama baran inay soo bandhigaan caddeymo ku aaddan dadka ay xukunada dilka ahi ku fulinayaan, marka laga soo taggo oraahda looga bartay ee ah isagaa qirtay.