Madxafka Hiddaha iyo Dhaqanka Soomaaliyeed ee Minnesota ayaa abaalmarinno guddoonsiiyay shakhsiyaad uu ka mid ahaa, madaxa laanta Af-Soomaaliga ee VOA, Cabdiraxmaan Yabarow.
Yabarow, oo ah suxufi rug caddaa ah ayaa abaalmarinta loogu magac-daray “Halyeyga” ku guddoomay xarunta ay munaasabadda ka dhacday oo ay xaadir ku ahaayeen boqolaal qof oo u badnaa Soomaalida ku nool Gobolka Minnesota. 
“Abaalmarintan waxay ka dhigan tahay oo ay qireysaa waxqabadkeygii inta aan kusoo jiray warbaahinta, iyo VOA-da oo ay dadka igu xasuustaan dhowr iyo tobanki sano ee u danbeeyay ee aan madaxda ka ahaa. Sidoo kale guushan waa mid u soo wada hoyatay dhammaan shaqaalaha VOA, kuwa jooga Washington iyo kuwa dunida daafaheeda ku baahsan.” Ayuu yiri Cabdiraxmaan Yabarow.
Cabdiraxmaan Yabarow oo Warbaahinta ka soo bilaabay Radio Muqdisho todobaatameeyadi ayaa u guuray Mareykanka, bilowgii siddeetamaadki.
Marka laga yimaado tacliinta u ku qaatay Mareykanka, wuxuu door ka ciyaaray horumarinta saxaafadda Soomaaliya, isaga oo u soo shaqeeyay idaacadaha caalamiga ah ee kala ah BBC-da laanteeda Af-Soomaaliga iyo Voice of America.
Wuxuu hormuud u ahaa saxafiyiintii lagu furay qaybta Soomaaliga ee VOA, oo uu marki dambena madax ka noqday sannadki 2009-ki.
Tan iyo xilligaasi, waxa uu VOA Somali gaarsiiyay in ay noqoto Warbaahinta loogu dhageysiga badan yahay Somaliya iyo guud ahaan dhulka ay Soomaalidu degto ee Bariga Africa.