Madaxweynaha Dowlad Goboleedka Koonfur Galbeed, Cabdicasiis Xasan Maxamed (Laftagareen) ayaa xilka ka qaaday Gudoomiyihii Gobolka Shabellaha Hoose, Ibraahim Aadan Cali (Najax), isagoona mid kale magacaabay.
Madaxweynaha ayaa Maxamed Ibraahim Barre u magacaabay inuu noqdo Gudoomiyaha Maamulka Gobolka Shabellaha Hoose.
Madaxweynahaha ayaa Xeer Madaxweyne xilka kaga qaaday Gudoomiyihii hore, kuna soo magacaabay midka bedelaya.
Maxamed Ibraahim oo nin dhallinyaro ah ayaa horey u soo noqday Gudoomiyaha Gobolka Shabellaha Hoose, xilligii Madaxweyne Shariif Xasan Sheekh Aadan.
Dhanka kale Madaxweyne Laftagareen ayaa Maxamed Cumar Axmed u magacaabay inuu noqdo Hanti Dhowraha Guud ee Koonfur Galbeed.
Madaxweynaha ayaa wareegto ku sheegay inuu ku qancay aqoonta iyo waaya-aragnimada ee ninkaasi, isla-markaana uu garowsaday in jegadaasi uu ku habboon yahay.
Tani ayaa ku soo aadaysa, iyadoo Koonfur Galbeed ay isku diyaarineyso wejiga labaad ee gulufka ka dhanka ah mintidiinta Al Shabaab.