Madaxweynaha Dowladda Federaalka, Xasan Sheekh Maxamuud ayaa caawa xilka ka qaaday Gudoomiyihii Maxkamadda Sare Dalka, Garyaqaan Baashe Yuusuf Axmed, isagoona magacaabay mid kale.
Madaxweynaha ayaa Garyaqaan Ibraahim Iidle Saleymaan u magacaabay in uu noqdo Gudoomiyaha Maxkamadda Sare, kaas oo horey xilkan u soo qabtay.
“Madaxweynaha oo tixgeliyay cabasho ka timid Garsooreyaasha dalka, howlwadeennada garsoorka iyo xirfadleyaasha sharciga ee la xiriira in la helo garsoor hufan oo caddaalad ah ayaa go’aansaday in dib-u-habayn ballaaran lagu sameeyo hay’adaha garsoorka, si muwaadiniinta Soomaaliyeed ay u helaan garsoor hufan oo la isku halayn karo.” Ayaa lagu yiri war ka soo baxay Villa Somalia.
Warka ayaa lagu soo geba-gabeeyay “Madaxweyne Xasan Sheekh ayaa Gudoomiyaha cusub u rajeeyay in uu ku guuleysto gudashada waajibaadka culus ee loo igmaday, isaga oo ku adkeeyay muhiimadda ay leedahay ilaalinta madaxbannaanida garsoorka, ku dhaqanka sharciga iyo xaqiijinta caddaaladda loo siman yahay.”